Աշխարհը փոխվեց վերջին համարյա մեկ տարվա ընթացքում, փոխվեց բացարձակապես ամեն ինչ, բոլոր ոլորտները մտան տրանսֆորմացիաների նոր փուլ, բայց թե ինչպես և ուր կտանեն այդ վերափոխումները՝ դեռ պարզ չէ:

Եկեք այնուամենայնիվ փորձենք հասկանալ, ինչ է կատարվում և ինչ է մեզ սպասվում մոտ ապագայում: Այդ նպատակով անդրադառնանք մի քանի թվային վերլուծության: Այսպես. համաշխաևրհային գիգանտ Nike-ը փակեց իր բոլոր խանութները ԱՄՆ-ում և շատ այլ երկրներում, մեկ այլ գիգանտի՝ H&M-ի վաճառքներն ընկան 50 %- ով, իսկ Oasis հագուստի խանութների ցանցը հայտարարեց իր ոչ վճարունակ լինելու մասին:

Մյուս կողմից, օրինակ՝ բավական ծավալուն առցանց խանութ-սրահներից մեկի տվյալների համաձայն հագուստի պահանջարկը բարձրացել է 69 %-ով, կոշիկինը՝ 40% ով, իսկ աքսեսուարներինը՝ 30 %-ով: Մեկ հետաքրքիր փաստ ևս, սպորտային ապրանքներ առցանց տիրույթում սկսել են փնտրել տասն անգամ ավելի հաճախ, իսկ կոսմետիկա և տան պարագաներ՝ երեք անգամ քան 2019 թ-ին:

Նորաձևության աշխարհը լուրջ փոփոխություններ է կրում, այո՛:

  1. Հագուստի ինդուստրիայի սկզբնաղբյուր հանդիսացող նորաձևության շաբաթները Միլանում, Լոնդոնում  և այլն անցկացվեցին առցանց տիրույթում:
  2. Տեղի ունեցան առաջին խմբագրական ֆոտոշութերը facetime-ով, աներևակայելի է, բայց ՝ փաստ:
  3. Մոդելներն ու մոդելային գործակալությունները դարձան պանդեմիայի արդյունքում առաջացած գործազրկության զոհերից:
  4. Առաջին անգամ պատմության մեջ գլամուրային սնդուսափայլ հրատարակություններից մեկը՝ Vanity Fair-ը աստղերի փոխարեն շապիկի տեղադրեց պանդեմիայի օրերին առաջնագծում գտնվող իրական հերոսներին՝ բժիշկներին:
  5. Վիրտուալ խանութներ և նախազգուշացում հագուստի խանութներին:

2020 թ.-ի ողջ ընթացքում հագուստի սպառումը կրճատվեց նաև այն պարզ պատճառով, որ մարդիկ տանից դուրս չէին գալիս և նորաձևության հիմնական ֆունկցիաներից մեկը՝ այն է հագուստի միջոցով պատմել այն կրողի մասին իր շրջապատողներին, դանձավ անհնարին: Այս է պատճառը նաև, որ ավելացավ տան պարագաների և սպորտային իրերի հանդեպ այդչափ մեծ հետաքրքրությունը, սակայն մյուս կողմից, աստիճանաբար խիստ իզոլացումը սկսել է զիջել իր դիրքերը, և հենց այստեղ է, որ սկսվում է ամենահետաքրքիրը:

Բազմաթիվ կանխատեսումների համաձայն համաշխարհային բրենդերից սկսած մինչև փոքր դիզայներական առցանց խանութներն ու retail-ը, կառուցելով իրենց կատարելագործված առցանց տիրույթները խիստ կսահմանափակեն իրական սրահների շահագործումը, սական առցանց տիրույթն էլ զարգացման և դինամիկայի իր պահանջներն է դնում: Ահա այստեղ է, որ ի հայտ է գալիս համեմատաբար նոր մի երևույթ՝ վիրտուալ խանութները:

Վերջին տասնամյակի ընթացքում գործարկվել են մի շարէ հավելվածներ, որ առաջարկում են սեփական պատկերը ներբեռնել ծրագիր և վիրտուալ տիրույթում փորձել այս կամ այն զգեստը: Այսօր նման ծրագրեր առաջարկվում են ավելի կատարելագործված տարբերակով, ասեմ ավելին՝ առաջարկվում է ստեղծել հագուստի վիրտուալ պատկերը, ստանալ պատվերներ իրական օգտատերերից և դրանից հետո միայն տվյալ մոդելն ուղարկել արտադրության: Ահա այսպես, հեռու չէ այն ապագան, երբ վիրտուալ աշխարհն իրականից ավելի առաջ և ավելի հեռուն է գնալու, իսկ մեզ միայն մնում է համապատասխանել նոր տեմպերին, հատկապես, որ առցանց առևտուրը դարձել է մեր կյանքի անբաժան մասերից մեկը: